Расскажите о Вашей проблеме - решим ее вместе!
Меню
16+

Сетевое издание «Деловой Кайтаг»

31.05.2017 15:42 Среда
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Урк1и мях1камбарая

Автор: Кумсият Мяхмудова

Шимала мераначиб гьанна гипертонияла (х1ила гъяжла) изайчила х1ергъибси адам рахлира къарших1еркур. Ил изайчил имц1али зяг1ипбиркули саби хала г1ямрула мурул ва хьунул адамти, жагьилти. Амма стенокардия се сабил х1ебалути леб биэсра асубирар. Ил урк1и-тумала изала саби. Ил изайчил, зяг1ипбиркули бирар дигалли жагьилти, дигалли бухънаби. Урехиласи саби стенокардияла изала. Гьандуршех1е чумал мисал. Дубурла мерличибси шилизив х1ерируси ца адамла аги хапли вайбикиб -урк1и изес бях1иб. Амма урк1и паргъатбиайчи паргъатли х1евъни багьандан изала ц1акьбиубли ца камси заманала ух1нав вебк1иб. Тяп илкьяйда бетаур, абзур барх1и урк1и къизбик1улихьалли, сунела хъулив калунси адамлисра. Шишалра ухъес х1ейубли илала урк1и п1якьбикиб-инфаркт бетаур. Илдигъунти мисалти г1урра гьандушес вирар. Илди камдиахъес багьандан наб чумал насих1ят дурес дигулра.

Урк1и г1ях1ил бузахъес багьандан адамлис баарицад кислород х1яжатси саби. Ил биалли х1иличил барх башуси саби. Урк1и сецад гьалакли бузули биаллира, тяп илцадла имц1али х1яжатси саби кислородра. Кислородличи х1яжатдеш имц1абиубцад х1и дашахъути тумира баягъи илцад гьарзадик1ути сари. Амма туми гьарзадик1ес х1едирандиубх1ели яра х1и дашуси гьуйчиб царх1ил журала диргаладеш ак1алли, адам къиянси агилизи виркур: илала гьигь вайт1а башар, михъири изесбирхьур. Ил — стенокардияла изала саби. Илгъуна анц1букьлизиб урк1ира изесбирх1ур, илкьяйдали алгъай някълизи, алгъай к1ат1а кьулсализи къизбик1ар. Адам илгъуна агиличи викес асубирар ил гьалаксаурх1елира, г1ясивиубх1елира.

Се барес г1яг1нилив, гьат1и, илгъуна анц1букьлизив? Цаибилгъуна, бируси х1янчи т1ашаэс чебиркур. Илкьяйдали паргъатли кайэс, лезмилиу нитроглицеринна дарман кабихьес чебиркур. Эгер ца-к1ел минутла г1ергъи изала х1ярх1х1ебиалли, г1урра лезмилиу дарман кабихьая ва илкьяйда гьар 5-6 минутла г1ергъи г1урра тикрарбарая.

Ил изайзи имц1аливан 40 дусла г1ямрула чедибти адамти биркули бирар, хаслира г1якьлула х1янчи бузахъути, чархла бит1ак1 халати, чула саниг1ят х1ясибли камли вяшбик1ути. Ил багьандан илдас кисализиб мурталра нитроглицерин биахъни къулайси саби. Илкьяйдали зяг1иптачи тухтуртани х1еруди бирес г1яг1ниси саби. Илди адамтас ц1акьти держ, кофе, г1ях1ил ранг дак1ахъибти чай, г1ярякьи, чягъир — пайдаладирес асух1ебирар. Чедибра бурили кьяйда, илдас папрусра заралла саби. Дугели кьанси замана тухъси халаси кьадарлизиб хурег беркес асух1ебирар. Гьанк1 ахъес кайхьес х1ябал-авал сяг1ят гьалав укни къулайси саби. Г1ямал бетарули, жалла-къалмакъарла анц1букьуначирад тяйдили дуэная. Сегъуна биалра анц1букьлис яра балбуцлис гьалаб, урк1и паргъатбиахъес багьандан, дарман бержес г1яг1нибиркур.

Стенокардиялизи имц1али биркули бирар х1ила гъяжла ва чакарла излумазибад зяг1ипти. Ил багьандан илди излуми сагъдарес къайгъибарни-стенокардияличибад гьарахъли калахъеси г1ях1си тях1яр саби. 45-50 дусла г1ямруличи абаибти бахъалгъунти адамтала, хаслира мурул адамтала, урк1ила туми итил яра ишил даражализир гъярц1дирули дирар. Ил багьандан 45 дусла чедибти г1ямрула мурул адамтас чула кьаркьайс халаси гужбиэси х1янчи бирес асух1ебирар, хаслра илгъуна бурсидеш агартас.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

7